tonlistarskoli-fjardarbyggdar

Tónleikar Blásarasveitar Tónlistarskólans

Fri, 27 Feb 2026 08:57:35 GMT

Blásarasveit Tónlistarskólans hélt alveg stórkostlega tónleika í Egilsbúð fimmtudaginn 26. febrúar. Á efnisskrá voru popp og rokklög frá ýmsum tímum allt frá Grýlunum til Jeff Who. Árni Pétur Árnason sýndi snilldar tilþrif á básúnuna í laginu Bláu augun þín eftir Gunnar Þórðarson. Hljómsveitin töfraði fram hvert lagið á fætur öðru og uppskar standandi fagnaðarlæti í lokin. Hildur Þórðardóttir stjórnaði hljómsveitinni og á hún miklar þakkir skildar fyrir sitt starf.

Vetrarfrí og starfsdagur

Mon, 16 Feb 2026 16:51:19 GMT

Starfsdagur kennara verður í Tónlistarskóla Fjarðabyggðar miðvikudaginn 18 febrúar og vetrarfrí 19. og 20. febrúar. Engin kennsla verður þessa daga. Við vonum að allir nemendur og kennarar njóti vel.

Jólakveðjur frá Tónlistarskólanum

Fri, 12 Dec 2025 09:54:15 GMT

Jólakveðja

Undanfarnar vikur hefur starf Tónlistarskólans einkennst af tónleikaundirbúningi og tónleikahaldi. Skólinn hefur haldið fjölda tónleika og staðið fyrir ýmsum heimsóknum í aðdraganda jóla. Nú höldum við inn í jólafrí og hefst kennsla aftur 5. janúar.

Nemendur og starfsfólk Tónlistarskóla Fjarðabyggðar sendir öllum nær og fjær hugheilar jólakveðjur með ósk um velfarnað á nýju ári.

Vetrarfrí 29.-31. október

Wed, 22 Oct 2025 12:39:25 GMT

Vetrarfrí

Í næstu viku verður vetrarfrí í T ónlistarskólanum dagana 29.-31. október. Það verður gott að hlaða batteríin fyrir komandi jólatörn.

Vonandi geta öll notið þess að vera í vetrarfríi og við sjáumst hress.

Þrjúhundruð nemendur

Thu, 18 Sep 2025 16:21:34 GMT

300 nemendur í Tónlistarskólanum

Nú á haustönn eru hvorki meira né minna en þrjú hundruð nemendur skráðir í tónlistarnám við Tónlistarskóla Fjarðabyggðar. Lang flestir nemendur eru á grunnskólaaldri. Það er virkilega gaman að sjá hvað aðsókn að námi í Tónlistarskólann er mikil og stöðug.

Í Tónlistarskólanum er mikil gróska og stöðugt verið að leita leiða til að nemendur geti tekið þátt í ýmiskonar samspili sem eflir áhuga og framfarir. Áfram svona.

Fullt á haustönn

Tue, 09 Sep 2025 22:04:19 GMT

Getum ekki bætt við nemendum í bili

Það hefur verið mikil og góð aðsókn í tónlistarnám við Tónlistarskólann á haustönninni og nú er svo komið að skólinn getur ekki tekið við nýjum nemendum á haustönn. Hins vegar eru allar umsóknir um nám sem við getum ekki orðið við enn virkar og við tökum inn nýja nemendur ef aðstæður breytast. Einnig er ólíklegt að hægt sé að breyta um námsleið eða kennara vegna þess að allir kennarar eru komnir með fulla stundaskrá.

Tónlistarskólinn er fyrir öll

Thu, 04 Sep 2025 20:29:33 GMT

Tónlist fer ekki í manngreinarálit

Í ljósi umræðna á Íslandi og reyndar um allan heim undanfarið er mikilvægt að muna að tónlist er fyrir öll kyn hvernig svo sem þau skilgreina sig.

Menntastofnun eins og Tónlistarskóli Fjarðabyggðar má aldrei fara í manngreinarálit út frá kyni, þjóðerni, litarhætti, félagslegri stöðu, fötlun eða nokkru öðru.

Tónlist er eitthvað það mikilvægasta sem sameinar okkur öll og er vettvangur fyrir okkur öll til að vinna saman á jafnréttisgrundvelli. Umburðarlyndi og samvinna eru meginstoðir í starfi Tónlistarskóla Fjarðabyggðar.

Skólabyrjun

Fri, 22 Aug 2025 13:49:41 GMT

Kennsla hefst 26. ágúst

Starf Tónlistarskóla Fjarðabyggðar er í þann mund að hefjast. Kennsla hefst samkvæmt stundaskrá þriðjudaginn 26. ágúst.

Nú eru kennarar Tónlistarskólans í óða önn að smíða stundatöflur og þeirri vinnu lýkur 25. ágúst ef allt gengur upp.

Kennarar verða svo í sambandi við sína nemendur með upplýsingar um kennslutíma. Það getur tekið nokkra daga að slípa stundatöflur til eftir að kennsla hefst.

Næsta skólaár og umsóknir

Fri, 09 May 2025 20:01:34 GMT

Nýtt fyrirkomulag í Neskaupstað

Nú fara í hönd lokavikur starfsárs Tónlistarskóla Fjarðabyggðar. Þeir nemendur sem vilja halda áfram í sama námi og þeir hafa verið í þurfa EKKI að sækja um skólavist á næsta skólaári heldur eru þeir sjálfkrafa skráðir áfram í nám. Aftur á móti þurfa þeir nemendur sem vilja breyta sínum námsleiðum t.d. auka við námið, minnka eða skipta um hljóðfæri að láta okkur í Tónlistarskólanum vita af því.

Þetta fyrirkomulag hefur verið viðhaft allsstaðar í Fjarðabyggð nema í Neskaupstað og viljum við breyta því þar. Þannig þurfa nemendur í Neskaupstað ekki að innrita sig fyrir næsta skólaár en láta vita af breytingum. Einfaldast er að tilkynna breytingar í netfangið tonlistarskoli@fjardabyggd.is

Ný heimasíða Tónlistarskóla Fjarðabyggðar

Mon, 28 Apr 2025 15:13:50 GMT

Nú er komin í loftið ný heimasíða Tónlistarskóla Fjarðabyggðar. Hún er stöðugt í þróun og smám saman koma fleiri upplýsingar inn. Nú eru helstu upplýsingar komnar s.s. skóladagatal, skólanámskrá, upplýsingar um kennara, skólareglur, viðburðir, fréttir úr starfinu og fleira.

Einnig fékk Tónlistarskóli Fjarðabyggðar Esther Ösp Gunnarsdóttur til að hanna logo fyrir skólann. Okkur þykir það afskaplega vel heppnað og er einfalt og lýsandi.

Tónlistarskóli Vesturbyggðar í heimsókn

Mon, 28 Apr 2025 13:17:21 GMT

Tónlistarskóli Fjarðabyggðar fékk góða gesti í heimsókn föstudaginn 25. apríl. Það voru skólastjóri og kennarar frá Tónlistarskóla Vesturbyggðar. Dagurinn hófst á heimsókn í Tónlistarskólann í Neskaupstað. Þar var starfsemi Tónlistarskóla Fjarðabyggðar kynnt og hvernig starfið fer fram. Nokkrir nemendur Tónlistarskóla Fjarðabyggðar komu og léku fyrir gestina og endaði heimsóknin í Neskaupstað á því að kennarar og nemendur spiluðu nokkur lög saman. Þaðan var haldið í Tónlistarmiðstöð Austurlands á Eskifirði og aðstaðan skoðuð og starfsemin kynnt. Því næst lá leið hópsins í Tónlistarskólann á Fáskrúðsfirði þar sem aðstaðan var skoðuð og umræður sköpuðust um faglegt starf tónlistarskóla almennt.

Sköpunarmiðstöðin á Stöðvarfirði var meðal viðkomustaða og þar tók á móti okkur starfsfólk hennar og leiddi hópinn um húsið og sýndi hvaða starfsemi er í gangi þar en hún er býsna fjölbreytt. Vinny Wood upptökustjóri í Stúdíó Síló tók á móti hópnum og sagði frá uppbyggingunni og starfsemi upptökuversins. Þar hitti hópurinn líka hljómsveitina BSÍ sem var við upptökur.

Dagurinn endaði með sameiginlegum kvöldverði á kaffihúsinu Hamri á Breiðdalsvík.

Tónlistarskólinn í samstarfi við Grunnskóla Reyðarfjarðar

Thu, 10 Apr 2025 10:39:55 GMT

Fimmtudaginn 10. apríl setti Grunnskóli Reyðarfjarðar á svið leikritið Dýrin í Hálsaskógi. Tvær sýningar voru haldnar svo að allir áhugasamir kæmust til að horfa. Dagurinn var strembinn og voru þrjú rennsli og svo tvær sýningar þann daginn.

Tónlistarskólinn sá um tónlistina og tókst bara vel til.